傷

原來傷心到極點時唔係太痛苦，

只係會腦海一片空白，

而且需要非常咁安靜，

唔識得再決定任何事，

唔敢，亦唔想做任何選擇．．．

點解我地永遠都係明知故犯？

明知食煙冇益又要食？

明知凍又唔著多d衫？

明知前面冇路仲要行？

係要撞到頭崩額裂先安樂？

愛 = ?

“愛係包容、體諒、遷就、不計回報˙˙˙”

但係咪每個人都做到？對方唔愛自己仍然無怨無求咁付出？

呢類絕種生物我諗拍戲先有，我覺得“愛”係一股好強既力量，

不論係親情或者友情，甚至養隻寵物，都係因為中間有愛既存在，

所以建立出一份感情，亦因為重視呢份愛，所以會包容、體諒、遷就、不計回報．．．

如果面對一個自己唔愛既人，仲可以做得到咩？

咁其實兩個人喺埋一齊，最基本都要互相愛對方啦，

只要大家都愛對方，就算發生咩事都會化解，

愈愛得深，大家既包容、體諒、遷就既力量就愈大，

只要係兩個一齊去面對，感情一定會因為呢d經歷變得穩固，

如果得一個人面對，其他人我唔知，但我就唔夠力撐．．．

迷惘

細姑媽離開左已經兩日，我既心情唔知可以點形容，

相比嫲嫲果陣，今次平靜好多，

除左見到細姑媽果陣劈大喉嚨喊左幾個鐘之外，

到宜家都冇再喊過，又冇好似上次咁一提起就喊，

但今次唔知點解成個人好似唔係自己既咁，

個腦轉唔到，自己想做咩都唔記得．．．

姑媽走得咁突然，我好難接受，

我明白再難接受我都一定要接受，

所有嘢都靠自己，冇人可以幫到我，

果晚見完姑媽，我走左出醫院門口食煙，

果陣已經半夜２點，醫院門口一個人都冇，

我好想有個人陪我，唔洗氹我咖，

陪住我就夠喇，要求好高咩？

自身難保之餘，仲要扮堅強去安慰其他人，

為左唔想其他姑媽要送自己妹妹走，

又要扮堅強咁送埋姑媽去殮房，

近呢半年我身上不停發生好多唔好既大事，

或者我個樣唔覺，但其實我真係好驚，好辛苦，

我只係想有個人肯認真花時間去明白我，

同我講"我知道你辛苦．．．"，真係咁難咩？

係咪永遠有問題既都係我？

我好努力去遷就，去包容，去改變，

結果都係冇人感覺到，又係我錯．．．

傷心

啱啱先從屯門醫院返嚟，

琴晚十點收到電話，話細姑媽頭暈入醫院，

但情況危殆，要有心理準備，

過左個幾鐘，就收到細姑媽走左既消息，

我真係完全接受唔到，喺屋企喊到呼天搶地，

但去到醫院望住細姑媽，唔知點解喊唔出，

我覺得佢好似有呼吸，只係訓著左咁，

點解原本身體健康，都無拉拉咁既？

到宜家我仲係一舊雲咁，我係咪發緊夢呀？